Косовска Митровица, 20 август 2014 (МИА) - Претставници на локалните власти во северно Косово денеска одржаа состанок во Косовска Митровица, на кој оценија дека европската мисија ЕУЛЕКС го отежнува имплементирањето на Бриселскиот договор постигнат меѓу Белград и Приштина.
Тие најавија дека в петок ќе се одржи заедничка седница на советниците од четири општини во северно Косово во кои Србите се мнозинство, на која ќе биде разгледана ситуацијата и ќе бидат донесени решенија за натамошното дејствување.
Србите во северно Косово сметаат дека ЕУЛЕКС не ги применува законите во однос на Србите, како што тоа го прави во случајот со Албанците.
Тие истакнаа дека на Албанците обвинети за најтешки злосторства им се дава можност да се бранат од слобода, додека на Србите тоа право им е оневозможено.
Ваквата реакција се однесува на одлуката лидерот на косовската Граѓанска иницијатива „Србија, демократија, правда“ (СДП), Оливер Ивановиќ, кој е уапсен под сомнеж за воени злосторства, да остане во притвор и покрај тоа што Владата на Србија даде гаранции, дека тој ќе се појави во судот, со цел да се брани од слобода.