Сараево, 22 октомври 2014 (МИА) - Апелацискиот совет на Судот на Босна и Херцеговина ја поништи пресудата од 45 години затвор за радикалниот исламист Харис Чаушевиќ, поради терористички напад врз полициска станица во Бугојно и нареди обновување на судската постапка, јавија денеска босанските медиуми.
- Одлуката е донесена, но за нејзината содржина не можеме да говориме, додека страните во постапката не ја добијат во пишана форма, истакнаа претставници на Судот.
Адвокатот на Чаушевиќ, Ифет Фрагет за „Дневни аваз“ изјави дека се уште не ја добил одлуката, но оти може со сигурност да каже дека првостепената пресуда е укината.
Пресудата од 45 години затвор е највисоката, која е можно да се изрече во БиХ за терористичко дејствување.
Чаушевиќ на таа затворска казна беше осуден во декември 2013 година, откако е утврдено дека го организирал и извршил бомбашкиот напад врз полициската станица во Бугојно во јуни 2010 година, во кој загина еден полицаец, друг беше потешко повреден, а уште петмина полесно.