Сараево, 26 мај 2014 (МИА) - Светската банка денеска оцени дека катастрофалните поплави во земјите од Западен Балкан ќе доведат до забавување на нивниот економски раст, како и дека во следните шест месеци ќе се соочат со проблеми во снабдувањето со електрична енергија.
Повеќе од 50 лица загинаа при поплавите и лизгање на земјиштето во Србија, БиХ и Хрватска, предизвикани од дождовите, кои беа најпоројни во последните 100 години. Дождот доведе до зголемување на нивото на водата во реките и поплавување на патишта, мостови, обработливи површини и цели населени места.
Србија и БиХ беа најпогодени од природната непогода, а штетите се проценуваат на стотици милиони евра, што е огромен удар за нивните економии.
Производството на струја во Србија се намали за 40 проценти како резултат од десетдневниот прекин на работата на најголемата електроцентрала. Проблематично беше и снабдувањето со електрична енергија во БиХ, а помалку во Хрватска.
Според директорот на Светска банка за Југоисточна Европа, Елан Голдстејн, во текот на оваа година поплавите ќе предизвикаат намалување на економскиот раст, а најголем проблем ќе претставува снабдувањето на електроцентралите со потребното гориво поради поплавените рудници со јаглен.