Лондон, 14 септември (МИА) - Поранешниот портпарол на Меѓународниот суд за воени злосторстава за поранешна Југославија во Хаг, Флоренс Хартман, е прогласена за виновна и осудена за непочитување на судска одлука, јавува Би-Би-Си.
Хартман која е поранешна француска новинарка, е казнета со парична казна од седум илјади евра, јави дописникот на МИА од Лондон.
Во пресудата на судот Хартман е прогласена за виновна затоа што обелоденила доверливи документи за вмешаноста на српската влада во војната во Босна и Херцеговина во деведесеттите години на 20 век, иако со судска одлука тоа не било дозволено.
Документите за кои Хартман е осудена се објавени во нејзината книга, што таа ја напиша по повлекувањето од Трибуналот во Хаг, како и во еден напис што го објави по појавувањето на книгата.