Киев, 17 февруари (МИА) - Врховниот административен суд на Украина (ВАС) почна да разгледува жалба од кандидатката за претседател Јулија Тимошенко во која се оспорени резултатите од вториот круг на претседателските избори што се одржаа на 7 февруари.
Во врска со жалбата на Тимошенко, Судот објави дека времено е укинато влегувањето на сила на одлуката на украинската Централна изборна комисија со која Виктор Јанукович е прогласен за победник на изборите.
Стапувањето во сила на одлуката на ЦИК е суспендирано додека Судот не се произнесе за жалбата на Тимошенко.
Тимошенко отиде вчера лично во ВАС, за да поднесе жалба. Жалбата е придружена од девет тома со докази за фалсификати, вклучувајќи и фото и видео материјали, изјави таа.
Украинскиот премиер планира да повика како сведоци меѓународни набљудувачи, вклучувајќи од Организацијата за безбедност и соработка во Европа (ОБСЕ).
Врховниот административен суд има рок од два дена, за да се произнесе по жалбата на Јулија Тимошенко, која беше победена на претседателските избори.