Виена, 22 февруари (МИА) - Шест лица загинаа, а 33 се повредени ноќеска околу полноќ во сообраќајна несреќа што се случи на автопат близу местото Баден, на 50 километри од австрискиот главен град Виена.
До несреќата дошло кога автобус со германски регистарски таблички, што патувал од Косово кон Германија, од засега непознати причини, удрил во товарен камион, кој пак потоа удрил во друг камион.
Двата камиона, кои се движеле еден зад друг, биле со словачки и романски регистарски таблички.
Четворица од загинатите биле патници во автобусот, во кој имало 42 лица, додека останатите две жртви патувале со камионите.
Како што соопшти австриската служба за брза помош, 16 лица се потешко повредени, додека уште 17 минале со полесни повреди.
Првично како можна причина за несреќата се наведуваше голомразицата на коловозот, но како што јавуваат утрово австриските медиуми, до инцидентот најверојатно дошло поради премореност на возачот, бидејќи во тоа време автопатот бил сув.