Бишкек, 14 јуни 2010 (МИА) - На властите во киргистанскиот град Ош зафатен со немирите им било наложено да се подготват за пристигнувањето на руски војници, јавија медиумите во Бишкек. На веста претходеше соопштение дека рускиот претседател Дмитриј Медведев размислува да достави воена помош на Киргистан, кој не може да се справи со нередите.
За време на викендот Медведев отфрли слично барање од Бишкек.
Меѓуетничкото насилство во Ош меѓу Киргистанците и етничките Узбеци утринава беше запрено, но се соопштува за судири меѓу претставниците на двете заедници во Џалалабад.
Во Киргистан се наоѓаат руски и американски војници. Се тврди дека властите не се обратиле за помош кон САД.
Русија вчера распореди стотици војници дополнително во воената база во Кант, каде се приземјија три воени авиони со баталјон руски десантни единици. Тие, меѓутоа, биле задолжени само со задачата да ја гарантираат безбедноста на базата.
Узбекистанското малцинство тврди дека над 500 лица се убиени во судирите, додека според официјалните податоци бројот е 117 лица. Извори од Црвениот крст соопштија дека многу тела биле погребани без да бидат идентификувани.