Москва, 14 јуни (МИА) - Рускиот претседател Дмитриј Медведев денеска изјави дека ситуацијата во Киргистан е неподнослива.
- Најмалку 124 лица се убиени во последните неколку дена во меѓуетничкото насилство во поранешната советска република. Развојот на настаните е исклучително опасен. Убиени се луѓе, во етнички немири се пролева крв. Тоа е исклучително опасно за регионот и затоа треба да се направи се што е можно за да се стави крај на овие дејствија, истакна Медведев.
Според шефот на рускиот Совет за безбедност и претседател на Советот на секретарите на Организацијата на договорот за колективна безбедност, Николај Патрушев оваа организација, која е раководена од Русија и обединува повеќе земји од поранешен СССР, не ја исклучува можноста за воена поддршка во Киргистан, со цел да му се стави крај на етничкото насилство.
- Подготвивме мерки, кои ќе им ги предложиме на претседателите на земјите од организацијата, во која членува и Киргистан, додаде Патрушев.