Минск, 15 јуни 2010 (МИА) - Главното обвинителство на Белорусија денеска го одби барањето на Бишкек за екстрадирање на соборениот киргистански претседател Курманбек Бакиев, изјави официјалниот претставник на Обвинителството, Пјотр Кисељов.
- Барањето на киргистанската страна за екстрадирање на Бакиев не е прифатено, истакна Кисељов, одбивајќи да ги објасни причините за донесување на таквата одлука.
По масовните протести во Киргистан на 6 и 7 април, на власт дојде опозицијата и формира привремена влада. Бакиев на 15 април потпиша изјава за повлекување, по што кратко престојуваше во Казахстан, а сега се наоѓа во Белорусија.
Белорускиот претседател Александар Лукашенко на 20 април изјави дека Бакиев и неговото семејство се наоѓаат во Минск под негова и заштита на државата.
- Како човек и како претседател имам право да донесам таква одлука, истакна Лукашенко.