Довил, 19 октомври 2010 (МИА) - Лидерите на Франција, Германија и Русија се сретнаа синоќа во францускиот град Довил со цел да се обидат да ги зацврстат добрите односи и да најдат заедничко мислење во врска со проектот на НАТО за противракетен штит, кој Москва го смета за закана.
Германската канцеларка Ангела Меркел и претседателите на Франција Никола Саркози и на Русија Дмитриј Медведев синоќа имаа заедничка вечера во француското туристичко место Довил, а нивните тристрани разговори продолжуваат денеска.
Германија и Франција го отворија патот за заострени санкции против членките на ЕУ кои прават преголеми долгови, јави Дојче веле на македонски јазик.
Меркел и Саркози за време на нивната средба, на барање на Германија, постигнаа компромис сепак да нема автоматски санкции за земјите со преголем државен дефицит. Конечната одлука околу казнените мерки треба да ја донесе Советот на ЕУ.
Безбедноста е најголемиот проблем во односите меѓу Русија и Западот. Ова ќе биде централна тема во разговорите меѓу тројцата лидери.
- Довербата е многу важна, Студената војна заврши, Варшавскиот договор го нема. Русија е наш пријател и ние сакаме да бидеме нејзини пријатели. Сега опасностите и заканите се еднакви и за Франција, и за Германија и за Русија, изјави Саркози пред вечерата.
Русија ќе се обиде да ја искористи средбата во Довил за да ја зголеми својата улога во сферата на европската безбедност и надворешната политика.