Париз, 17 април 2012 (МИА) - Францускиот претседател Никола Саркози денеска ги отфрли тврдењата на поранешната генерална директорка на француската нуклеарна компанија „Арева“ Ан Ловержон дека тој сакал да му продаде нуклеарен реактор на поранешниот либиски лидер Моамер Гадафи до средината на 2010 година.
- Никогаш не станало збор за продажба на реактор на Гадафи. Можам да потврдам, дека ако на светот постои еден претседател кој немал врски со Гадафи и кој не е одговорен за неговата судбина, тогаш тоа сум јас, истакна Саркози.
Ловержон, која раководеше со „Арева“ до 2011 година, беше главен советник на претседателот Франсоа Митеран и е предвидена за министер во идната влада на социјалистите, доколку нивниот претседателски кандидат Франсоа Холанд победи на изборите.
Нејзините тврдења во моментов се сметаат како политички напад против Саркози, кој се обидува да ја зголеми поддршката за изборите, кои според социолошките истражувања ќе ги освои Холанд во вториот круг на 6 мај.