Брисел, 15 мај 2012 (МИА) – Европската комисија нема одговор на прашањето зошто новиот француски претседател Франсоа Оланд, по денешната инаугурација во Париз, веднаш заминува во посета на Берлин, а не на Брисел, како престолнина на Европската унија и седиште на сите поголеми европски институции, пренесува дописникот на МИА од Брисел.
На денешниот редовен прес-брифинг во Комисијата, ова прашање беше поставено со оглед на веќе стекнатата пракса новите челници на француската држава прво да заминуваат во Берлин, а потоа да доаѓаат во Брисел, со оглед на тоа што и при инаугурацијата на Никола Саркози, тој исто така најпрво ја посети германската престолнина.
- Ова е точна констатација, но не знаеме, ниту мислиме дека има некаква позадина. Кога Саркози стана претседател, тој по посетата на Берлин веднаш дојде во Брисел, додека Оланд нема потреба да доаѓа тука, со оглед на тоа што со претседателот на ЕК, Жозе Мануел Баросо, за два дена ќе се сретне на Самитот во Камп Дејвид во САД, а и викендов ќе имаат средби за време на Самитот на НАТО во Чикаго – констатираа од прес-службата на Европската комисија.