Лондон, 12 април 2013 (МИА) - Поранешниот германски канцелар Хелмут Кол изјави дека некогашната британска премиерка Маргарет Тачер е виновна за лошите врски меѓу Велика Британија и Европската унија.
За лондонски „Тајмс“ Кол открива дека никогаш немал доби односи со Тачер, но сепак ја истакнува нејзината чесност и храброст и големиот придонес што го има направено за Велика Британија и за нејзините граѓани.
Изјавата на Кол (83), кој 16 години беше германски канцелар, вклучувајќи го и времето кога Тачер беше британски премиер, доаѓа по повод смртта на поранешната „Челична лејди“, која во понеделникот почина од мозочен удар на 87-годишна возраст.
Кол ја опишува некогашната британска премиерка како „тежок (политички) партнер“, па затоа како тешки ги оценува и нивните меѓусебни односи, како и односите од двете страни на каналот Ламанш меѓу Велика Британија и ЕУ, која во времето на нивното владеење беше Европска економска заедница.
Според Кол, европското наследство на Тачер е само антагонизмот кон се што доаѓа од другата страна на Каналот. Од германска страна гледано, тој нејзин антагонизам ја карактеризира и денешната британска политика кон ЕУ, забележува некогашниот канцелар на Германија.
- За разлика од односите со другите европски лидери од тоа време и со светот, и покрај напорите од двете страни, Тачер и јас никогаш не успеавме да изградиме доверба и топли односи. Таа ја сакаше Европа, но сакаше Заедницата да биде сосема поразлична од она што го сакавме јас и сите други европски политичари, вели Кол за „Тајмс“.