Киев, 28 јануари 2014 (МИА) - Украинскиот опозициски лидер Арсениј Јаценјук го отфрли предлогот на претседателот Виктор Јанукович да ја предводи владата, изјави министерот за правда Олена Лукаш по синоќешната четиричасовна средба меѓу претседателот и опозицијата.
Лидерот на опозициската партија „УДАР“, Виталија Кличко изјави дека не гледа никаква можност да влезе во составот на новата влада.
Јанукович на претходната средба со опозициските лидери на 25 јануари им предложи на лидерот на фракцијата „Баткившчина“, Јаценјук да стане премиер, а на Кличко вицепремеир за хуманитарни прашања.
Властите и опозицијата сепак се договорија да бидат поништени оспоруваните закони, кои беа изгласани на 16 јануари и кои доведоа до радикализирање на протестите. Станува збор за закони, со кои се санкционираат учесниците во протестите.
Двете страни се договориле да биде спроведено амнестирање на сите демонстранти.
Сепак за да се спроведе амнестијата на демонстрантите потребно е тие да ги ослободат сите јавни згради и да си заминат од улиците.
Не е познато дали барањето на опозицијата за одржување предвремени избори оваа година било разгледано на средбата.
Поништувањето на законите се случува во пресрет на планираната за денеска седница на украинскиот Парламент, како и самитот Русија-ЕУ, кој ќе се одржи во Брисел.
Во Киев денеска се очекува да пристигне високиот претставник на Европската унија за надворешна политика и безбедност, Кетрин Ештон, која претходно ќе разговара со рускиот претседател Владимир Путин, кој ќе учествува на самитот Русија-ЕУ. Од вчера во посета на Киев е и еврокомесарот за проширување Штефан Филе.