Лидерот на СДСМ Зоран Заев, по одлуката на Основниот суд Скопје 1 – Скопје за случајот „Пуч“, денеска изјави дека не го признава правосудството како независна власт по Устав и по закон, дека нема да присуствува на закажаните рочишта во врска со случајот „Пуч“ и да се јавува во Судот секој понеделник. По оваа негова јавна изјава очекува Судот да му изрече мерка притвор. И покрај ова, преговорите за излез од политичката криза ќе продолжат.
- Јас сум во просториите на СДСМ или во „Кампот на слободата“ пред Владата, рече Заев на прес-конференција.
Обвини дека одлуката на Основниот суд Скопје 1 – Скопје да се прифати обвинителниот акт против него е нарачана од премиерот и спроведена од обвинителот Марко Зврлевски. - Судот нема дадено никакво објаснување за одбивање на разумните приговори на обвинението, не само за мене или мојот адвокатски тим, туку и за домашната и за меѓународната правосудна јавност, рече Заев.
И покрај тоа што не го признава Судот, документи до обвинителството ќе доставува за, како што рече, да се остави трага за она што се случувало.
Заев рече дека и покрај оваа негова одлука преговорите за излез од политичката криза ќе продолжат и очекувањата се дека треба да финишираат до крајот на неделата.
Одговарајќи на новинарско прашање, рече дека преговорите со ВМРО-ДПМНЕ и со ДУИ и ДПА се одвиваат на различни партиски нивоа. - Меѓупартиски преговори постојат во посредство со меѓународната заедница, рече лидерот на СДСМ.