Скопје, 9 јули 2015 (МИА) - Коалициските партнери и претседателите на партиите што и се придружија на опозициската коалиција, денеска на средба во седиштето на Социјалдемократскиот сојуз му изразиле целосна поддршка на лидерот на СДСМ Зоран Заев во чекорите за, како што се наведува, враќање на слободата и демократијата во Македонија.
Како што соопшти СДСМ, тие се согласиле со оценката дека лидерот на ВМРО-ДПМНЕ го прекршил договорот од 2 јуни и дека преговорите за надминување на политичката криза се неуспешни.
- На состанокот се разгледуваа натамошните чекори на СДСМ и опозицијата во насока на интезивирање на сите можни форми и механизми за враќање на демократијата во Македонија. Партиите се подготвени да ги насочат своите активности на терен, според координираните насоки што ќе ги утврдат нивните партиските органи, се вели во соопштението на СДСМ.
Воедно, се додава дека СДСМ и опозицијата ги почитуваат заложбите на меѓународната заедница за решавањето на политичката криза во Македонија.