Дива камп зона за мигрантите во Гевгелија

Меѓузоната кај Гевгелија може да се преплави од мигранти доколку Македонија ги засили контролите на граничниот појас. Најмалку илјада мигранти секојдневно доаѓаат на дивите премини во меѓузоната барајќи транзит низ државата, и најверојатно ќе останат таму доколку Грција не го контролира пропуштањето кон македонската граница и Унгарија го запре влезот во Унијата со изградбата на ѕидот, пренесува ТЕЛМА.

Жителите на Гевгелија стравуваат дека може да дојде до бегалска криза во Македонија и Србија и создавање на диви камп зони во Гевгелија и Прешево. Засега немаат поплаки од мигрантите, освен на отпадот и нечистотијата што го создаваат кај железничката.

Полицијата досега ги пропушта сите мигранти, но во помали групи, давајќи им предност на жените и децата.

Мигрантите во просторот кај македонско-грчката граница се жалат дека долго чекаат за влез во државата. Сонцето и жештините се само дел од проблемите.

Соочени со големиот бран на бегалци од Блискиот Исток претседателот Иванов пред два дена најви дека Македонија во следниот период ќе дејствува согласно постапките на земјите од Европската Унија, што значи дека ако се засилат контролите на српската граница како и на влезот во Унгарија, и Македонија ќе го редуцира влезот на бегалци во земјата. За подобро обезбедување на граничниот појас на полицијата ќе и се придружи и македонската армија.