Скопје, 23 јуни 2016 (МИА) - СДСМ денеска побара Уставниот суд веднаш да се изјасни за уставноста на Законот за Специјалното јавно обвинителство, а дотогаш нивните пратеници нема да учествуваат во работата на Собранието.
- Сите политички партии треба да докажат дека навистина ја поддржуваат работата на Специјалното јавно обвинителство. Парламентарните партии својата вистинска поддршка за работата на Специјалното јавно обвинителство ќе ја докажат доколку и тие не учествуваат во работата на Собранието. Тоа се однесува и за независните пратеници, изјави денеска лидерот на СДСМ, Зоран Заев.
Тој оцени дека вчерашното обраќање на претседателот Ѓорге Иванов е обид да се наруши угледот, статусот и правната поставеност на СЈО.
Според Заев, политичката криза треба што побрзо да заврши, а излезот од неа е можен само преку владеење на правото и исполнување на условите за слободни, фер, демократски и кредибилни избори.
Заев повтори дека потребно е прочистување на избирачкиот список, реформи во медиумите и формирање влада којашто ќе создаде услови и ќе спроведе слободни, фер, демократски и кредибилни избори.
- Прогонот на граѓаните коишто протестираат мора да прекине. Истовремено истакнуваме дека опозицијата се согласува граѓаните да бидат активно вклучени во преговарачкиот процес, рече Заев.