Спасовски: Полицијата злоупотребена на вчерашните студентски избориСкопје, 1 јули 2016 (МИА) - Генералниот секретар на СДСМ Оливер Спасовски денеска оцени дека вчерашните студентски избори се криминални и фалсификувани и побара оставка од министерот за внатрешни работи Митко Чавков, за, како што изјави денеска, злоупотребата на полицијата.
Според Спасовски, „со злоупотреба на полицијата било спречено елементарното право на студентите на слободен избор“, била „згазена автономијата на Универзитетот и нападната иднината на Македонија“.
- Одговорност за злоупотребата на специјалната полицијата против студентите мора да понесат сите инволвирани. Митко Чавков треба веднаш да замине од позицијата министер за внатрешни работи, заедно со целата нелегитимна и незаконска Влада на ВМРО-ДПМНЕ и ДУИ, изјави Спасовски, оценувајќи дека зад ваквите случувања стојат сценарија на власта за судир на граѓаните.
Најавениот протест на студентите за денеска, како што рече Спасовски, СДСМ го сметаат за целосно оправдан и го поддржуваат.
ВМРО-ДПМНЕ, наведе, прави се во Македонија да не се создадат услови за решавање на политичката криза.
|