Ловџиите извршија прихрана на дивеч во Липковско

Kуманово,18 јануари 2017 (МИА) - И покрај ниските температури, членовите на ловџиското друштво „Шќипоња“ од Липково деновиве извршија прихрана на дивеч во липковскиот регион.
Како што соопшти денеска членот на претседателството на друштвото Јовица Стојиќ, ловџиите прихраниле срни, дива свиња и друг вид диви животни. На претходно утврдени локации оставале сено, детелина, сол и пченка.
- Прихраната е многу значајна за животните и мислам дека успешно ја спроведовме во неколку наврати иако беше тешко да се дојде до одредени места поради високите наноси снег. Со ваква акција ќе продолжиме и во наредниот период, изјави Стојиќ.
Здружението во овој период активно соработува со МВР и граничната полиција, постојано се на терен како превенција од ловокрадци.
Стојиќ напомена дека ловџиите мора да поседуваат дневни дозволи. Во реонот што го опфаќа „Шќипоња“, ловиштето број 2 - -Думановце, кој, пак, ги опфаќа речиси сите села од Липковско кон границите со Србија и Косово, има доволен број дивеч, особено дива свиња чиј лов завршува на 31 јануари годинава, а за штетен дивеч, волк, лисица продолжува цела година.