Скопје, 11 мај 2017 (МИА) - Граѓаните и целата домашна јавност, како и меѓународната заедница отворено и јасно се запознаени со програмата на новата реформска влада која што ја гарантира унитарноста на Македонија, работа според Уставот и евро-атлантските интеграции, наведува СДСМ во денешното соопштение.
- Парламентарното мнозинство е подготвено да ја реафирмира пред јавноста и пред Ѓорге Иванов, Програмата на новата Влада и тоа ќе го направи. Но, врвен интерес на граѓаните е Иванов да постапи согласно Уставот, да престане со сите неразумни оправдувања што имаат за цел обид за заштита на Никола Груевски од правдата и веднаш да го додели мандатот за состав на нова Влада на претседателот на СДСМ Зоран Заев. Граѓаните, општините, институциите имаат потреба од итна стабилизација на државата, истакнуваат од СДСМ.
Секое спречување на мирен трансфер на власт и секое попречување на легитимното парламентарно мнозинство да формира Влада, според СДСМ, е противуставно дело кое е казниво со закон.
- Укажуваме дека е неопходно сите да се вклучат во демократските процеси за напредок на државата. Граѓаните и целата домашна јавност, како и меѓународната заедница отворено и јасно се запознаени со Програмата на новата реформска Влада која што ја гарантира унитарноста на Македонија, работа според Уставот и евро-атлантски интеграции, стои во соошпштението од СДСМ.