Скопје, 23 мај 2017 (МИА) - Македонија нема да биде правна држава се додека во целост не биде расчистен организираниот напад во Собранието, истакнуваат од СДСМ и нагласуваат дека никој нема да биде амнестиран од одговорност без разлика дали е пратеник, полицаец, припадник на АРМ, судија, обвинител или обичен граѓанин.
- Вчерашните снимки од безбедносните камери во холот на Собранието го докажаа директното учество на ВМРО-ДПМНЕ во обидот за организирање на терористичко загрозување на уставниот поредок и обид за убиство на дел од пратениците. Снимките се клучниот доказ дека Никола Груевски лаже.
Иако постојано тврдеше дека неговата партија нема ништо со упадот во Собранието, на снимките од надзорните камери јасно се гледа дека најмалку шест пратеници на ВМРО-ДПМНЕ и еден пратеник од нивната коалицијата, и помагаат и ја поттикнуваат групата во извршување на низа кривични дела, изјави денеска портпаролот на СДСМ Петре Шилегов.
Тој посочи дека целата јавност можеше да види кој го планирал, поттикнувал и го организирал упадот на толпата на 27 април.
Според Шилегов, денешните ослободителни пресуди за учесниците во толпата се криминал, срам и можеби еден од најцрните денови во историјата на македонското судство.
Тоа, како што појасни, значи дека „Зврлевски, судските извршители на Груевски, како и Митко Чавков, пратениците на снимките, структурите од УБК, МВР и АРМ кои учествуваа во нападот, како и нарачателите и непосредните извршители на кривичните дела ќе мора да одговараат за своите постапки пред независни и професионални судови, согласно Уставот и законите на Република Македонија“.
Прашан дали Заев утре ќе оди во Брисел, Шилегов рече дека Заев како мандатар за состав на новата влада добил лична покана од Федерика Могерини за присуство на утрешната средба. Прецизира дека Заев прво ќе има билатерална средба со Могерини, а потоа ќе присуствува на заедничката вечера со премиери од регинот.