Претседателот Црвенковски во посета на Полска

Скопје, 8 мај (МИА) - Претседателот на Република Македонија Бранко Црвенковски на покана од полскиот претседател Лех Качински, од денеска до 10 мај ќе престојува во дводневна официјална посета на Република Полска.

Покрај средбата со својот полски колга Качински, претседателот Црвенковски, како што соопшти неговиот Кабинет, ќе има средби и со Маршалекот на  Сејмот и со Маршалекот  на Сенатот, Лудвиг Дорх и Богдан Борушевич.

За време на посетата во Варшава Црвенковски ќе се сретне и со претседателот на Советот на министри на Полска, Јарослав Качински.

На средбите ќе биде разговарано за унапредување на односите меѓу двете земји. Ќе стане збор за  интензивирање на севкупната македонско-полска соработка особено на планот на економската размена и за  евроатлантската интеграција на Македонија и искуствата на Полска.

Во Варшава ќе биде потпишана Спогодба за уредување на соработката меѓу Република Македонија и Република Полска. На вториот ден од посетата Црвенковски со сопругата Јасмина ќе престојува во Краков што каде ќе го посети Јагиелонскиот Универзитет, Мариацката Црква и ќе се сретне со Војводата Малополски Мациеј Клима, се вели во соопштението од Кабинетот на македонскиот претседател.