Четиринаесет ученици од основното училиште “Рајко Жинзифов“ во скопската населба Драчево вчера вечера биле примени на Инфективната клиника поради симптоми на труење со храна.
Уште во текот на вчерашниот ден десетина деца кои посетувале целодневна настава во училиштето си заминале дома порано бидејќи им било лошо. Подоцна сите 14 деца поради влошената здравствена состојба биле примени на Инфективната клинка.
Портпаролот на општина Кисела Вода под чија надлежност е училиштето вели дека денеска 13 деца биле пуштени на домашно лекување, само едно девојче е задржано, но и тоа е во добра состојба.
Се претпоставува дека децата се затруле откако јаделе во училишната менза.
“Известен е Државниот санитарен инспекторат и тие излегоа на терен. Земени се мостри од кујната и храната. Во моментов кујната е затворена и таа не се употребува“, вели Марјан Спасески, портпарол на општина Кисела Вода.
Тој додава дека училиштето било краен корисник на храната, од која најверојатно се затруле децата. Храната за учениците во училиштето ја доставувало приватната фирма ФУДО Младост.
Директорот на училиштето уште синоќа откако бил известен за труењето ги посетил децата во болница.
Точниот предизвикувач на труењето кај 14-те ученици ќе се знае откако ќе се добијат конечните наоди.