Скопје, 21 октомври (МИА) - Кривичниот суд во Скопје денеска му одреди казна затвор од две години на Ѓорги Ѓорѓиески, возачот на џипот „туарег“, во кој пред две години загина македонската музичка ѕвезда Тоше Проески.
Според Судот, причина за сообраќајната несреќа биле непочитувањето на сообраќајните правила, недоволно растојание меѓу возилата, како и возење со непрописна брзина.
Претходно, обвинителство и одбраната на обвинетиот Ѓорѓи Ѓорѓиески ги дадоа последните зборови пред завршната пресуда.
Според обвинителството Ѓорѓиески во моментот на несреќата возел со 152 километри на час, што било спротивно со ограничената брзина. Во услови на намалена видливост и неприлагодена брзина на коловозот Ѓорѓиески задоцнето го почнал претекнувањето што било главната причина за ударот. Обвинителството побара Ѓорѓиески да биде казнет поради небрежност.
Одбраната на Ѓорѓиески, повторно посочи на контрадикторноста во вештачењето на џипот укажувајќи дека голем пропуст е што во целиот судски процес не се појавил возачот на камионот Славиша Кузмановиќ, кој не само што бил сведок, туку бил и втор учесник во несреќата.
Одбраната побара од Судот да се земе во предвид и нарушената психичка состојба на Ѓорѓиески, како и ненадоместливата штета што му била нанесена со загубата на неговиот најдобар другар.
Трагедијата во која животот го загуби 26-годишниот Тоше Проески се случи пред две години на 16 октомври на автопатот Белград - Загреб, во близина на Нова Градишка.