Претседателот на Република Македонија Ѓорѓе Иванов денеска ќе се обрати на Втората светска конференцијата за меѓурелигиски и меѓуцивилизациски дијалог што се одржува во Охрид.
На вториот ден од меѓународниот собир обраќања ќе имаат и Бутрос Бутрос Гали, поранешен генерален секретар на ОН, кој сега е претседател на египетскиот Националниот совет за човекови права и Вилма Трајковска, сопруга на поранешниот претседател Борис Трајковски, на чија иницијатива започна одржувањето на меѓурелигискиот и меѓуцивилизациски форум.
На агендата се повеќе панел дискусии на теми „Почитување на верските права и разликите на културите - темел на мирот и просперитетот“ и „Како се впишува жената во религиските дискурси“.
Во попладневниот дел ќе се изврши избор на Меѓународен организационен комитет за Третата светска конференција, а ќе биде усвоена и завршна декларација со што официјално ќе се затвори форумот.
На Конференцијата присуствуваат околу 480 домашни и странски гости од повеќе од 30 земји од неколку континенти, истакнати политичари, научни и културни работници, видни експерти и универзитетски професори кои се занимаваат со прашања од областа на религијата и културата, претставници на меѓународни и на младински организации, како и претставници на невладиниот граѓански сектор.
На форумот има претставници на римокатоличката, муслиманската, евангелистичко-методистичката црква, Црквата на Исус Христос, будисти, претставници на Еврејската заедница, адвентисти, протестанти, како и високи црковни лица од Русија, Албанија, Ерменија, Индија, Либан, Ватикан, Израел, Швајцарија, Австрија, САД.
Конференцијата „Религијата и културата - нераскинлива врска меѓу народите“ се организира во рамките на Меѓународната година на Обединетите нации за зближување на културите. Настанот е во рамките на „Декадата за дијалог помеѓу цивилизациите“ и „Декадата за култура на мирот на ОН и УНЕСКО“ и претставува континуитет на дијалогот започнат во Охрид од 26 до 28 октомври 2007 година.
Организатор на Конференцијата е Министерството за култура во соработка со Комисијата за односи со верските заедници на Република Македонија. Настанот е поддржан од Владата на Република Македонија и од УНЕСКО.