Скопје, 7 јуни 2010 (МИА) - Се надеваме дека Македонија и Грција ќе најдат решение за спорот за името во брзо време, изјави денеска амбасадорот на САД во Република Македонија Филип Рикер по средбата со народниот правобранител Иџет Мемети.
- Нашите ставови, надежи и цели во однос на Македонија се многу јасни. Уште од почетокот на годината многупати сум го кажал ова и сметам дека нашиот став е добро познат, а го потврди и заменикот државен секретар, Филип Гордон во текот на посетата на Македонија минатиот месец. Нашата цел е тоа решение да се најде во брзо време, рече амбасадорот Рикер.
Тој смета дека решението е можно, додавајќи дека не треба да се создава нешто повеќе од проблемот што веќе постои.
- Со цел да се движат кон поубава иднина, двете земји можат да изнајдат решение, но тоа сепак зависи од нив, посочи американскиот амбасадор Рикер.