Скопје, 25 јуни 2010 (МИА) - Со митингот што ќе се одржи в недела пред Владата ќе биде означен стартот на барањето на СДСМ за предвремени избори по ноември, изјави денеска портпаролот на партијата Емилијан Станковиќ.
- Митингот е против економското осиромашување, газењето на демократијата и загрозувањето на човековите права, слободата на медиумите и невладиниот сектор, уништување на стопанството и против колапсот во јавното здравство, рече Станковиќ.
Најави дека в недела треба да пристигнат речиси 500 автобуси и 150 комбиња за превоз на граѓаните надвор од Скопје и оти интересот за присуство на митингот ги надминал нивните почетни очекувања.
Што се однесува до сценариото, засега сигурно е обраќањето на претседателот на СДСМ Бранко Црвенковски, а се очекува да се обрати и уште еден претставник од опозицискиот фронт.
- Добивме одобрение и согласности за сите наши активности од сите вклучени страни. Досега нема закани од никој, но поради безбедност, освен државните структури, изнајмивме професионална агенција за обезбедување, а имаме и сопствена редарска служба, рече Станковиќ.
Партискиот портпарол ги демантираше гласините дека градоначалниците на СДСМ им се закануваат на своите вработени да присуствуваат на митингот в недела.
Станковиќ од името на партијата им се извини на сите граѓани, бидејќи в недела во текот на целиот ден сообраќајот на улиците пред Владата ќе биде затворен.