Гостивар, 22 јули 2010 (МИА) - По десет месеци предистражни дејствија, Основното Јавно обвинителство нема да покрене обвинение за пожарот во Бигорскиот манастир. Со донесувањето на резолуција, случајот е затворен.
- По добиените вештачења и експертизи од вешти лица утврдено е дека огнот се појавил во потпокривот на манастирската кујна. Како причина се смета краток спој на проводници на електричната инсталација која е поставена во 1994 година. Најверојатно искрењето од краткиот спој го предизвика и потпалувањето на дрвената конструкција, изјави Елизабета Јосифоска обвинител во Основното јавно обвинителство - Гостивар, која работеше на предметот.
Според Јосифоска, донесена е резолуција со која нема да биде покренато обвинение и дека пожарот е сплет на повеќе околности, а најмногу придонел високиот степен на, како што кажа, пожарно оптоварување.
Обвинителката подвлече, дека со затварањето на предметот, отфрлени се сите шпекулации за подметнување и наводни мотиви за предизвикување на пожарот.
Пожарот во манастирот „Св. Јован Бигорски“ избувна на 30 септември 2009, при што изгоре горниот палат во кој имаше кујна, трпезарии, библиотека и живеалишта на монасите.