Скопје, 15 септември 2010 (МИА) - Околу 12.300 бруцоши кои на првиот уписен рок во август запишаа прва година на државните универзитети денеска ќе ја почнат студиската 2010/2011 година. Бројот на студенти во прва година е поголем зашто денеска факултетите ќе ги запишат и примените кои се пријавија во вториот уписен рок, на 2 и 3 септември, кога конкурираа околу 4.600 кандидати. На факултетите каде што се уште има слободни места, утре ќе има и трет уписен рок.
Запишаните бруцоши на Универзитетот „Св. Кирил и Методиј“ денеска заедно ќе имаат прв академски час на централното одбележување на почетокот на 2010/2011 година во салата „Борис Трајковски“. Ним ќе им се обрати претседателот Ѓорге Иванов, а ќе ги поздрават и министерот за образование и наука Никола Тодоров и ректорот на Универзитетот Велимир Стојковски.
На Скопскиот универзитет во август се запишаа 6.683, на Битолскиот 2.358, на Државниот универзитет - Тетово 2.648, на „Гоце Делчев“ во Штип 2.285 и на Универзитетот за информатички науки во Охрид на првиот уписен рок се запишаа 72 бруцоши.
На петте државни универзитети годинава беа распишани 27.046 слободни места за прва година во 2010/2011 година. Од нив, 16.089 за редовни студенти во државна квота, 7.305 за редовни со кофинансирање и 3.652 места за вонредни студенти.
За оваа академска година значително е намалена партиципацијата за студирање на државните универзитети. Највисокиот износ за кофинансирање на студиите е 400 евра, наместо 1.200 евра од минатите години. Оние кои веќе студираат во квотата со кофинансирање ќе плаќаат по стариот ценовник и според договорот што го потпишале при запишувањето. Износот за државната квота е унифициран и е 200 евра годишно за сите факултети, а за дисперзираните студии во редовната квота е 100 евра.