Јован Делов од населбата Варош од Охрид исплива од осветените води на Охридското Езеро со крстот во рака. Тој беше најсреќен и меѓу неколку стотини млади од Охрид и целата држава оваа година ќе носи среќа за себе, своето семејство но и за целиот христијански свет.
Околу 20.000 луѓе, православни верници од Охрид и од други делови на Македонија, но и гости од странство присуствуваа на чинот на осветувањето на водите на Охридското Езеро по повод големиот христијански празник Богојавление - Водици.
Со церемонијата на осветувањето на езерските води чиноначалствуваше митрополитот дебарско - кичевски г. Тимотеј во сослужение на високи правосвештеници.
Празникот Богојавление е поврзан со крштевањето на Исус Христос од Свети Јован, кој оттогаш се нарекува Крстител, а фаќањето на крстот значи соединување на човекот со Христа.
Овој празник уште се нарекува и Водици поради големиот водосвет што го извршува Црквата на овој ден. Водосветот е симбол на обновувањето на нашата огревовена природа и на целиот космос преку вода и дух.
Верскиот празник е одбележан во сите храмови и градови во Македонија, како и меѓу верниците на МПЦ во Европа и прекуокеанските земји.