Скопје, 2 март 2011 (МИА) - Министерот за надворешни работи Антонио Милошоски денеска го прими новиот шеф на Делегацијата на Европската унија во Република Македонија, амбасадорот Питер Ингеман Моесгаард Соренсен, кој му ги предаде копиите од акредитивните писма за неговото именување.
На средбата, соопшти денеска МНР, беа разменети мислења за актуелните состојби во регионот и беше поздравен позитивниот прогрес на реформите во Република Македонија.
Посакувајќи му срдечно добредојде и успех во извршувањето на новата функција, министерот Милошоски го истакна убедувањето дека богатото професионално искуство на амбасадорот Соренсен и неговиот претстоен ангажман во поддршка на спроведувањето на Европската реформска агенда на Република Македонија, ќе придонесат нашата земја, за време на неговиот мандат да ја исполни крајната цел – полноправно членство во Европската Унија.