Претседателот на Европската комисија Жозе Мануел Баросо придружуван од еврокомесарот за проширување и соседска политика Штефан Филе денеска ќе ја посетат Република Македонија во рамки, при што ќе остварат средби со македонскиот државен врв.
Предвидено е претседателот на Европската комисија Баросо со претседателот на Република Македонија Ѓорге Иванов да одржат предавање на тема „На патот кон интеграцијата во ЕУ: Партнери во реформите за наша заедничка европска иднина“.
Како што најави кабинетот на претседателот на Владата, Баросо и премиерот Никола Груевски ќе имаат тет-а-тет средба, по што ќе следи пленарна средба на делегациите на Република Македонија и на Европската комисија.
Најавени се и средби на Баросо со лидерите на СДСМ и на ДУИ, Бранко Црвенковски и Али Ахмети.
Портпаролот на Баросо, Микаел Карничниг во изјава за Дојче веле вчера рече дека претседателот на Европската комисија при утрешната посета на Македонија посебнно ќе инсистира на потребата од еден вид историски договор меѓу различните политички сили и на култура на компромис заради европска интеграција на земјата.
- Стратегиската цел на посетата на Баросо и комесарот за проширување Штефан Филе на земјите од Балканот е многу јасна - да се зацврсти нивната европската перспектива, додаде Карничинг.
Еврокомесарот Штефан Филе, пак, неделава, на расправата по резолуцијата за Република Македонија во Европскиот парламент во Стразбур, порача дека Македонија постигнала значаен напредок во многу области, но оти треба и понатаму да работи на реформите во политичкиот дијалог, правосудниот систем, слободата на медиумите. Нагласи дека Македонија во моментов се наоѓа на вистинска раскрсница.
- Или таа ќе продолжи на патот кон ЕУ со взаемна корист, или ќе заостане додека регионот напредува. Затоа време е и потребно е да бидеме на нивото на нашите одговорности, рече Филе.
Меѓу пораките кои во Охрид лично ќе ги пренесат Баросо и Филе, а беа посочени и во Стразбур, е потребата за одржување на регуларни, транспарентни и слободни избори во Македонија во согласност со меѓународните норми, како и за поголема одговорност на сите политички партии, кои во регионот имаат тенденција кога се во опозиција да ја бојкотираат работата на парламентот.
Со посетата на Македонија Баросо и Филе ја завршуваат нивната балканска турнеја, во рамки на која ги посетија и Хрватска и Албанија.