Скопје, 2 мај 2011 (МИА) - СДСМ денеска во Скопје на партиски конгрес ги утврди пратеничките листи и носителите на листите во шесте изборни единици, како и предизборната програма за претстојните предвремени парламентарни избори.
- Конгресот на СДСМ донесе три крупни одлуки - усвојување на предизборната програма, одлука за предизборна коалиција и утврдување на пратеничките листи и носителите на листите. Предизборната програма е обемна, конкретна, би рекол и владина програма со многу конкретни и храбри решенија кои драматично ќе ја сменат иднината на Македонија, изјави потпретседателот на СДСМ Гордан Георгиев по завршувањето на конгресот.
Тој посочи дека на конгресот е донесена одлука за предизборно коалицирање со 15 политички партии.
- Меѓу нив се НСДП, ПЕИ, две партии од турската националност, онаа на Аднан Ќахил и на Ердоган Сарач, една од ромската национална припадност, ПЦЕР на Самка Ибраимовски и уште десетина други поголеми или помали партии, појасни Георгиев.
На конгресот, нагласи, се донесе и одлука за кандидатските листи и додаде дека носителите во сите шест изборни единици ќе бидат од СДСМ.
- Во првата изборна единица носител на листата ќе биде Радмила Шеќеринска, во втората Ана Павловска Данева, во третата Стевчо Јакимовски, во четвртата Зоран Заев, во петтата Јани Макрадули и во шестата Стојко Пауновски, автентично решение од Општинската организација на СДСМ од Тетово, рече Георгиев.
На кандидатските листи, посочи, не се наоѓаат имињата на Владо Бучковски и Бранко Црвенковски, но тие, како што кажа, ќе бидат на браникот на СДСМ за да ја обработат победата на СДСМ на 5 јуни.
Георгиев потврди дека на листите се наоѓаат имиња на новинари и тоа на Сафет Бишевац како претставник на Санџачката лига, како и Ленче Николовска за која рече дека е експерт од А1 телевизија.