Скопје, 7 јуни 2011 (МИА) - Припадник на специјалната единица „Тигри“ најверојатно со два удари го усмртил 22-годишното момче кое што ноќта во неделата наспрема понеделникот беше пронајдено мртво на плоштадот во Скопје.
МВР денеска соопшти дека го расветлила случајот и оти во моментов се разговара со осомничениот, за кој подоцна ќе биде поднесена и соодветна кривична пријава.
- Според наодите од Судска медицина кои МВР ги добило вчера во 16 часот станува збор за насилна смрт на 22-годишното момче од Скопје. Следува соодветна истрага, изјави портпаролот на МВР Иво Котевски.
Осомничениот, пак, кој ноќта бил на должност на плоштадот, се пријавил сам кај својот претпоставен и според информациите на Министерството воопшто не знаел дека момчето починало.
Случајот, како што рече Котевски, на почеток бил пријавен како „незнаена смрт“ имајќи предвид дека надворешно момчето немало видливи повреди на телото. - Беше информиран јавен обвинител и истражен судија по чија наредба телото беше дадено на обдукција во Институтот за судска медицина, додаде тој.