Атина, 4 септември 2011 (МИА) - Во изминатите 20 години имаше моменти кога или кај Атина или кај Скопје имаше волја и флексибилност за прифаќање компромис, но никогаш во исто време, истакнува посредникот на ОН во грчко - македонските преговори за името Метју Нимиц во интервју за „Катимерини“.
Нимиц вели дека по толку години неуспешно посредување, сепак, верува оти решение е можно и се надева дека преку дијалог и конструктивност на раководствата на двете земји би можело да се дојде до заеднички прифатлив компромис. Но, засега не планира да излезе со нов предлог, се додека, како што додава, не биде уверен оти тоа би можело да даде некаков резултат.
- Како што стојат сега работите не е лесно да се стави на маса нов предлог, се додека не се добијат гаранции од двете страни дека има сериозен интерес за таков чекор од моја страна, односно сериозна шанса да биде прифатен како основа за преговори. Во оваа фаза подобро е да не се дава нов предлог, кој би можел да биде одбиен од едната или од другата страна. Досега на маса беа ставени многу идеи кои заслужуваат да бидат разгледани преку дијалогот што се води во ОН или билатерално. Постојано повторувам дека сум подготвен секогаш да помогнам, истакнува Нимиц.
Тој ги поздравува билатералните контакти на премиерите Никола Груевски и Јоргос Папандреу, што според него, ги отвора перспективите и овозможува да се претпостави дека е можно да се надминат несогласувањата.
„Катимерини“ во интервјуто со Метју Нимив, наведува и дека според грчки и македонски извори, двете земји биле најблиску до договор во 2001 година во времето на премиерите Љубчо Георгиевски и Костас Симитис и тоа за името „Горна Македонија“.