Скопје, 15 септември 2011 (МИА) - Судскиот процес против претседателот на Обединети за Македонија Љубе Бошкоски, кој е обвинет за нелегално финансирање на предизборната кампања започна денеска. Тој во Основниот суд Скопје 1 се бранеше со молчење поради влошена здравствена состојба.
Адвокатите на Бошкоски побараа да му се одреди домашен притвор поради здравствени причини, но Судот го одби нивното барање со образложение дека временскиот период до наредното судење е краток и оти Бошкоски можел да издржи со неговата здравствена состојба.
Исказ пред судиите денеска даде Никола Поп Илиев, шеф на изборната кампања и потписник на сметката на партијата. Тој тврдеше дека се што се плаќало за изборната кампања одело преку специјалната сметка на партијата, отворена за кампањата. За водењето на кампањата биле поднесени и уредни извештаи до институциите.
Пред Судот денеска беа собрани членовите на Обединети за Македонија, кои бараат ослободување на Бошкоски.
Полицијата го уапси Бошкоски на 6-ти јуни годинава, ден по одржувањето на предвремените парламентарни избори. Тогаш во неговото возило беа пронајдени 100.000 евра. Оттогаш Бошкоски се наоѓа во притвор во Шуто Оризари.