Премиерот на Турција Реџеп Таип Ердоган денеска и утре ќе престојува во официјална посета на Република Македонија.
Претседателот на Владата на Република Македонија Никола Груевски ќе го пречека турскиот премиер Ердоган на аеродромот Александар Велики. На пречекот ќе се одржи церемонија со највисоки државни и воени почести.
Двајцата премиери ќе направат обиколка на објектот на аеродромот „Александар Велики“.
Потоа во Владата Груевски и Ердоган ќе одржат тет-а-тет средба, а предвидени се и официјални разговори на македонската и на турската делегација.
Турскиот премиер Ердоган денеска ќе се сретне и со претседателот Ѓорге Иванов и со претседателот на Собранието Трајко Вељаноски. Средба со турскиот премиер ќе има и лидерот на Демократската унија за интеграција Али Ахмети.
Во рамките на официјалната посета, сопругите на премиерите Боркица Груевска и Емине Ердоган се очекува денеска да ја посетат Детската амбасада „Меѓаши“ во Скопје.