Бујановац, 10 ноември 2011 (МИА) - Тројца македонски државјани загинаа утрово во директен судар на автомобил и камион на автопатот Ниш-Скопје кај Бујановачка Бања, пренесуваат српските медиуми.
Портпаролот на Полициската управа во Врање Драган Стаменковиќ изјави дека тројцата македонски државјани, кои биле во автомобилот, загинале на местото на несреќата, додека возачот на камионот е повреден.
Сообраќајната несреќа се случила во 7 часот и 20 минути кај Бујановачка бања и сите загинати биле во патничко возило марка „Фиат браво“ кое се движело кон македонската граница. Според српските медиуми, несреќата се случила кога автомобилот се обидел да престигне друго возило на делот од патот каде што не било дозволено, а камионот доаѓал од спротивен правец и директно удрил во него.
Изутрината на тој дел од патот имало густа магла, па се претпоставува дека тоа е една од причините за тешката сообраќајна несреќа.
Сообраќајот на патниот правец Врање - Прешево бил во прекин повеќе од три часа, а сообраќајот се одвивал по алтернативни патишта.