Скопје, 14 февруари 2012 (МИА) - Сообраќајот на сите магистрални и регионални патни правци се одвива забавено, во зимски услови по влажни коловози на места со остатоци од снег особено на планинските превои и повисоките места, и лизгави поради ниските температури и појавата на голомразица. Поради појава на магла намалена е видливоста на планинскиот превој Плетвар до 50 метри, соопшти Авто-мото сојузот на Македонија.
Забрана за движење за сите видови возила и понатаму има на патните правци Маврови Анови – Дебар и село Маврово – Никифорово – Леуново - Бунец. За тешки товарни возила не е дозволено сообраќање на планинските превои Стража, Пресека и Буково, и на патниот правец Струга – граничен премин Ќафасан. Кон Попова Шапка се уште е забранет сообраќајот за автобусите.
АМСМ на возачите им препорачува крајно внимателно возење, прилагодена брзина на движење по лизгавите и со остатоци од снег коловози и одржување на потребното растојание помеѓу возилата. Интензитетот на сообраќај е умерен надвор од градските средини. На граничните премини нема подолги чекања. Законската обврска за задолжително поседување зимска опрема во возилата ќе трае до 15 март.