Марихуаната, што утрово беше запленета во камион со тетовски таблички во Италија, е вредна околу милион евра, соопшти Министерството за внатрешни работи.
Како што информира македонската полиција, утрово на пристаништето во Бари, Италија сопрено е товарно моторно возило марка “Мерцедес“ со тетовски регистарски ознаки, управувано од лицето А.И.(58) од Тетово. При извршениот преглед на камионот, со кој се вршел легален транспорт на фероникел од Македонија преку Албанија за Италија, пронајдени се 272 пакувања со околу 300 килограми марихуана.
Дрогата, според сознанијата на македонската полиција, била натоварена во товарното возило на непозната локација во Албанија. Од страна на италијанската полиција, возачот А.И. е лишен од слобода и се работи на целосно расчистување на случајот. Според првичните проценки, вредноста на марихуаната на европските наркопазари, на улица изнесува до 900.000 евра.