Охрид, 2 април 2012 (МИА) - Воодушевен сум од убавините на регионот, гостопримливоста на македонскиот народ насекаде каде имав можност да остварам контакти во овој навистина кус временски период, изјави мексиканскиот бизнисмен Карлос Слим на прес-конференцијата по завршувањето на ИТ конференцијата што се одржа во Охрид.
- Немав многу време за повеќе да разгледам, малку знаев за Македонците, знаев нешто за Александар Велики, нешто за историјата за земјата, но простете ми на моите скромни познавања. Дури пред два дена дознав дека Мајка Тереза е родена тука, рече Слим истакнувајќи дека штом ќе има можност повторно ќе дојде во Македонија.
Меѓудругото, мексиканскиот милијардер ја истакна и посветеноста на владиниот тим и активностите што ги презема за развој на земјата.
Преостанатото време од тридневната посета на Македонија Слим ќе го искористи за обиколка на најпознатите културно-историски знаменитости на Охрид.
Најбогатиот човек на светот копретседаваше со Состанокот на Меѓународната комисија за широкопојасен интернет и дигитален развој, што за првпат од нејзиното основање се одржа надвор од вообичаената практика да се состанува во нејзините седишта во Женева, Њујорк и Париз.