Трибина за измени на Законот за донации и спонзорства

Гостивар, 12 април 2012 (МИА) - Потребата од измени во постојниот Закон за донации и спонзорства во јавните дејности беше тема на трибина која се одржа во Гостивар. Покрај објаснувањата на експертите, за асистентите во надворешните канцеларии на пратениците од петтата и шестата изборна единца беше органирана и обука како да прибираат мислења околу новиот закон.

Во дискусиите беше констатирано дека проблемите во спроведувањето на Законот, во најголем дел не се должат на несоодвтена примена на обврските од страна на институциите, туку на одредбите и нивното толкување.

- Сложената процедура, според која може да се реализра даночното олеснуавње е еден од клучните проблеми. Тоа укажува на недостиг на доверба во концептот на приватното донирање кое законот мора да го поттикнува, рече Никица Кусиникова извршен директор на невладината „Конект“.

„Конект“ е дел од работната група за изготвување на новиот Закон во рамки на Министерството за правда. Целта на активностите е да се обезбеди активно учество на засегнатите страни и јавноста во изготвувањето на новиот Закон.

Во 2010, „Конект“ започна иницијатива за изменување и дополнување на Законот за донации и спонзорства во јавните дејности, со цел поттикнување на филантропијата и општествената одговорност во Република Македонија.