Таксист, земјоделец, автомеханичар, пензионер, па дури и една домаќинка се меѓу дваесетте приведени во полициската операција “Монструм“.
Шеесетгодишна домаќинка од липковското село Отља е меѓу приведените осомничени за инволвираност во петкратното убиство кај Смиљковското езеро на 12-ти април.
Фериде Билали е уапсена во понеделникот и кај неа полицијата пронашла пиштол. Билали живеела сама веќе 15 години откако нејзините синови заминале во странство.
Весникот “Коха“ објави дел од имињата на приведените. Браќата Чани Азири (64), Фејзи Азири (50), Хаки Азири (32) од Шуто Оризари се меѓу уапсените во вчерашната акција. Најстариот од браќата е пензионер, средниот е земјоделец, најмладиот е возач на камион.
Фејзи Азири, инаку, го има под концесија земјиштето околу Смиљковското езеро. Колку оваа информација била важна за истрагата за да се открие идентитетот на убијците, полицијата најверојатно ќе открие во наредниве денови.
Во акцијата вчера беа приведени и Мерван Џавити (24) од Арачиново, кој работел како автомеханичар, како и неговиот соселанец Исни Асани (34), таксист. Меѓу приведените е и дваесет и шестгодишниот Џевад Зендели од населбата Гази Баба.
Сите 20 приведени утринава беа изведен пред истражен судија во Основниот суд 1 во Скопје. Полицијата ги товари за тероризам за што е предвидена најмала казна од четири години затвор.