Стразбур, 16 мај 2012 (МИА) - во Европскиот суд за човекови права во Стразбур денеска почнува јавната судска расправа за предметот на германскиот државјанин Калед ел Масри против Македонија, јавува дописникот на МИА од Стразбур.
Случајот Ел Масри, ќе биде разгледуван и суден од Големиот судски совет на Европскиот суд за човекови права во Стразбур, откако Малиот судски совет одлучи дека не може да се изјасни по предметот и со тоа автоматски го префрли пред повисокиот судски орган.
Калед ел Масри поднесе тужба против Македонија на 20 јули 2009 година, во која се жали дека било прекршен членот 3 од Европската конвенција за човекови права, со кој се забранува нечовечко и понижувачко однесување, членот 5 ( правото на слобода и сигурност, членот 8 право на приватен и семеен живот, како и членот 13 право на правично судење, како и членот 10 (слобода на изразување) бидејќи не бил информиран дали бил изложен на тајната програма за трансфер на лица на американските тајни служби. Ел Масри ја смета Македонија за одговорна за неговото затворање меѓу 31 декември 2003 и 28 мај 2004 година, по неговото апсење при влезот во Македонија и трансферот во Авганистан.