Прага, 22 јуни 2012 (МИА) - Грците како да немаат доволно проблеми со владата и економијата, сега уште и ги прелепуваат македонските регистерски таблички на границите.
Вака чешката државна телевизија ја коментира најновата постапка на грчките цариници кои на автомобилите кои доаѓаат од Македонија во Грција им лепат назнака „Признаена од Грција како ФИРОМ“, наместо МК, јави дописникот на МИА од Прага.
И неделниот весник „Тиден" информира за прелепувањето на новите македонски регистерски таблички, наведувајќи дека „грчката страна се повикува на договорот од 1993 година кога Македонија под референцата ФИРОМ стана членка на ОН“.
Односите меѓу Скопје и Атина се наоѓаат на точка на замрзнување веќе 20 години, поради тоа што исто име носи и грчка област, а Атина поради нерешениот спор го блокира влезот на Македонија во НАТО и ЕУ, анализираат медиумите во Чешка.