Премиерот на Република Македонија Никола Груевски, по посетата на Република Српска синоќа се сретна со првиот човек на ДУИ Али Ахмети.
Средбата дојде по сериозно влошените и затегнати односи во коалицијата по настаните во Слупчане и воведувањето на законот за бранителите во собраниска процедура од страна на членови на ВМРО-ДПМНЕ. Ахмети на средбата му го пренел на премиерот Груевски официјалниот став на ДУИ во врска со ова прашање.
Од извори блиски до ДУИ, „Дневник“ јавува дека Ахмети образложил дека настанот во Слупчене не е инцидент, туку дека е во духот на Охридскиот договор. Тој потенцирал дека немале никаква намера со тој чин да се навреди или провоцира ниту една етничка заедница во Македонија. На тоа, пак, Груевски одговорил дека настанот во Слупчане длабоко ги повредил чувствата на Македонците.
За Законот за бранителите, пак, Ахмети го повторил веќе познатиот став - Или да бидат опфатени и припадниците на ОНА, со што тие би ги добиле истите права како и припадниците на безбедносните сили, или Законот да се повлече.
Ако тоа не се случи, тогаш, според Ахмети е доведено во прашање и опстојувањето на коалицијата.
Централниот комитет на ВМРО-ДПМНЕ денес ќе одржи седница на која ќе се заземе конечен став во врска со последните настани и коалицијата со ДУИ.
Според лидерот на СДСМ Бранко Црвенковски, конфронтацијата меѓу ВМРО-ДПМНЕ и ДУИ не е искрена.
- Ова што го гледаме овие денови го гледаме по десети пат во релациите меѓу ВМРО-ДПМНЕ и ДУИ во изминатите неколку години. Се изнаслушавме во разни ситуации жестоки критики, меѓусбени условувања и уценувања за на крај секогаш да се случи еден евтин политички пазар меѓу двете партии во власта и сето тоа да заврши со една топла братска коалициона прегратка, вели Црвенковски.
Неофицијално за во недела е закажана уште една средба помеѓу лидерите на ВМРО-ДПМНЕ Никола Груевски и ДУИ Али Ахмети.