Во главната зграда на Македонски Пошти во центарот на Скопје попладнево избувна голем пожар.
Противпожарните екипи по речиси двочасовна интервенција го локализираа пошарот што избувна попладнето во главната зграда на Македонски пошти во центарот на Скопје.
Пожарникарите со осум противпожарни возила успеаја да ги смират пламените јазици високи неколку метри, но над зградата се уште се издига чад.
Едно лице е пренесено во Клиниката за хирушки болести „Свети Наум Охридски“ во Скопје, поради гушење.
Директорката на Клиниката, Јасмина Чабуковска за МИА изјави дека станува збор за маж на околу 35 години кој се пожалил на тешкотии при дишењето. Тој е во стабилна здравствена состојба и во моментов е на опсервација.
Според првичните информации, пожарот избувнал во сервер салите во Македонски пошти.
Директорот на Македонски пошти Рафис Аљити рече дека во моментот на избувнување на пожарот бил во својот кабинет, кога вработените го информирале дека има пожар, по што веднаш вработените биле евакуирани. Една вработена која била заглавена во просториите, била извадена преку прозорец од третиот кат со помош на скали.
Портпаролот на СВР Скопје Лиза Бендевска информира дека пожарот бил пријавен во 16 часот и 20 минути.
Очевидци тврдат дека пред избувнувањето на пожарот слушнале силна експлозија.
На местото на настанот вечерва беа и министерот за транспорт и врски Миле Јанакиески и градоначалникот на Скопје Коце Трајановски.
Ова е втор голем пожар во центарот на Скопје во последните денови. Минатата недела се запали дел од првиот кат на Градскиот трговски центар.
