Скопје, 16 мај 2013 (МИА) - Aкадемик профeсор д-р Владо Камбовски е предложен за претседател на експертската комисија за настаните кои се случија и кои претходеа на 24 декември во Собранието од страна на Кабинетот на претседателот на државата на денешната средба на генералните секретари на ВМРО-ДПМНЕ и СДСМ, Кирил Божиновски и Андреј Петров.
- Ги повикуваме двете партии да се изјаснат по овој предлог на претседателот Иванов, со цел формирање на ад-хок комисијата и што поскоро започнување со нејзината работа, со крајна цел исполнување на постигнатиот политички договор од 1-ви март и целосно фокусирање кон евро-атлантските интеграции на Република Македонија, во пресрет на одржувањето на состанокот на Европскиот совет, се наведува во соопштението од Кабинетот на претседателот.
Јавното соопштување на предлогот на претседателот Иванов, како што се наведува во соопштението, следува по низата претходно одржани средби и неуспешни обиди за постигнување консензус за избор на претседател на комисијата.
Проф. д-р Владо Камбовски е актуелен претседател на Македонската академија на науките и уметностите, академик и професор на Правниот факултет „Јустинијан Први“ во Скопје.