Скопје, 19 ноември 2013 (МИА) - Недостигаат вкупно 166 артефакти од депото на Музејот на Македонија, покажал конечниот попис за кражбата, кој во моментот го разгледуваат инспектори во полицијата, потврди за МИА портпаролот на МВР Иво Котевски.
Претходно, првичните информации беа дека недостигаат 40 предмети со непроценлива вредност, кои потекнуваат од античкиот и римскиот период, пронајдени при ископување во Стоби и Исар Марвинци.
Списокот на исчезнати артефакти подоцна беше проширен. Полицијата утврди дека нема трага на провала, па сомнежите се дека станува збор за некој вработен во музејот. МВР се уште води истрага за кражбата.